Lëtzebuerger Studenten zu Saarbrécken

Saarbrécken ass d’ Haaptstad, Universitéitsstad an den Zentrum vum Saarland (Däitschland). Et leit ongeféier 100 Km (eng Auto Stonn) vun Lëtzebuerg un der Autobunn A8 Richtung Süd-Osten an Däitschland, direkt un der franséischer Grenz. D’ Stad selwer huet eng Fläch vun 167 km² an zielt iwwer 176.000 Awunner. Wéinst der Noperschaft zu Frankräich gëtt zu Saarbrécken och relativ vill franséisch geschwat.

Un Unien an Héichschoulen ginn et zu Saarbrécken ënner anerem d´Universität des Saarlandes (UdS), Hochschule der Bildenden Künste Saar (HBK), Hochschule für Technik und Wirtschaft des Saarlandes (HTW), Deutsch-Französische Hochschule, Hochschule für Musik Saar (HfM), Fachhochschule für Bergbau, Fachhochschule für Verwaltung des Saarlandes (FHSV), Katholische Hochschule für Soziale Arbeit, mee och Fuerschungszentren wéi d´Leibniz-Institut für Neue Materialien (INM), Max-Planck-Institut für Informatik, Max-Planck-Institut für Softwaresysteme, Fraunhofer-Institut für Zerstörungsfreie Prüfverfahren (IZFP), Deutsches Forschungszentrum für Künstliche Intelligenz an d´Korean Institute of Science and Technology.

Saarbrécken bidd ausserdem eng ganz Partie flott Attraktiounen wéi zum Beispill d’ Schlass, d’ Kasematten, den „Deutsch-Französischen-Garten“, den St-Johanner Markt mat senge Caféen an Restauranten an villes méi. Ausserdem ass d´Weltkulturerbe „Völklinger Hütte“ net weit weg.